Interi e ka nisur në formë të shkëlqyer sezonin e ri nën udhëheqjen e trajnerit Antonio Conte.

“Nerazzurrët” kanë përforcuar tutje kreun e tabelës me tri pikët e siguruara ndaj Sampdorias në takimin e zhvilluar në kuadër të xhiros së gjashtë në Serie A pasditen e sotme (e shtunë), shkruan portali arbresh.info.

Alexis Sanchez realizoi dy gola të njëpasnjëshme në pjesën e parë (20′, 22′) para se të ndëshkohej me kartonin e dytë të verdhë duke u përjashtuar nga fusha në minutën e dytë të pjesës së dytë.

Në mungesë të tij, nikoqirët ngushtuan disavantazhin duke shënuar me anë të Jakup Janktos për 1 me 2 në minutën e 55′.

Por, Interi gjeti portën sërish duke shuar shpresat e skuadrës në stadiumin Luigi Ferraris për rikthim në minutën e 61′ përmes Roberto Gagliardinit.

Interi pas gjashtë ndeshjeve ka pikë maksimale – 18 dhe udhëheq kreun e tabelës me dy pikë më shumë se Juventusi në pozitën e dytë, ndërsa Sampdoria vazhdon qëndrimin në fund të tabelës me vetëm tri pikë./arbresh.info/